01/03/2013 08:17:25

Media shqiptare në transformimet botërore dhe ndikimin teknologjik

Formati tradicional 'vdiq': media në Shqipëri duhet të shkojë online. Pohimi vjen nga gazetari, analisti dhe moderatori i emisionit Debat në Channel One, një prej drejtuesve të tre gazetave të rëndësishme në vend si Koha Jonë, Panorama dhe Tirana Observer. Roland Qafoku, në një intervistë eksluzive për HermesNews, flet për ndryshimin e lajmit, transformimin që po i bën teknologjia dhe të ardhmen e tij nën influencën e rrjeteve sociale

Cili është problemi më i rëndësishëm i gazetarisë shqiptare sot ?

Doriana, pikësëpari për mua është kënaqësi që jap intervistë për HermesNews dhe për ju personalisht. Si Hermes-i dhe ju, jeni nga “dallëndyshet” e para të formatit On Line, të medias shqiptare dhe në gjithë këto vite keni qenë model për mënyrën si ngrihet një media e tillë. Ky është dhe thelbi i përgjigjes së pyetjes që bëni ju. Këtë nuk e ka kuptuar dhe nuk e kupton aktualisht media shqiptare e shkruar. Gazeta me bojë të zezë që shkruhet në letër të bardhë, vdiq. Vdiq në SHBA e Itali, e jo më në Shqipëri. Unë nuk arrij t’a kuptoj se si në Shqipëri vazhdojnë të mos e pranojnë këtë realitet. Unë vij nga një përvojë e gjatë në median e shkruar duke drejtuar tre gazeta të rëndësishme. Kam qenë në një farë mënyre me fat që e nisa punën si gazetar kur doli jashtë funskioni shtypshkronja me plumb dhe lashë gazetarinë e shkruar për të kaluar në gazetarinë televizive kur nisi të dalë jashtë funksionit gazeta me letër dhe bojë për të kaluar on line. Sot dhe cdo ditë e më shumë nuk ka më njerëz që të kenë dëshirë të blejnë letër me bojë dhe ta fusin në shtëpi kur në cdo cep të një banese ka kompjuetra, ekrane, celularë, Ipad etj. Nëse dikush këmbëngul për të kundërtën është njëlloj si të bësh luftë me mullinjtë e erës. Fatkeqësisht në Shqipëri po bëhet kjo luftë. Sot, për informacion nuk ka një gazetë të vetme në Shqipëri që të funksionojë me abonime on line. Mbretëresha e shtypit të shkruar, “New York Times” del dy herë në javë në letër dhe shumë shpejt nuk do dalë më, do jetë on line. Këtë këmbëngulje alla shqiptare ma thoni ju, çfarë e quani ?

Sa dhe si ka mundur të dalë transmetimi i informacionit në Shqipëri nga kornizat e vjetëra (të komunizmit) ?

Madje jo vetëm nga koha e komunizmit, por edhe pas vitit 1990 e deri më sot, raportimi i lajmit ka evoluar shumë. Në vitin 1996-1997 mua më kujtohej se në gazetën Koha Jonë diskutohej nëse një informacion i ardhur në redaksi ishte apo jo lajm. Kjo është për të qeshur sot. Por raporti i lajmit në Shqipëri ka evoluar bashkë me kultivimin e gazetarisë profesioniste. Përpara vitit 1990-të nuk bëhej fjalë për gazetari profesioniste. Nëse ne sot kemi në Shqipëri juristë apo mjekë që siç punuan përpara vitit 1990 vazhdojnë të punojnë edhe sot, gazetarët e asaj kohe ose janë shumë pak ose asopak. Pikërisht mënyra e re profesionale e të raportuarit të lajmit, veçimi lajmit nga komenti ka sjell një revolucuion në median shqitare. Shumë pak vetë e dinë këtë histori, por ata që kanë bërë evoluimin dhe revolucionin e dinë se ckanë hequr.

Si po ndikon interneti në transformimin e informacionit në Shqipëri ? Cila është prespektiva që i jep ?

Interneti është shpikja e shekullit të 20-të që ka pushtuar dhe do jetë mbret i shekullit 21-të. Askush në botë nuk është i imunizuar nga interneti. Shembuj me ishuj si në Korenë e Veriut apo edhe në botën arabe janë duke u dorëzuar. Interneti është ai që drejton sot botën duke e bërë atë edhe më të vogël se fshatin e madh që dikur i thoshin botës se i binin përqark me avion, anije apo makinë. Sot me një të rënë të tastës, je në Miami, po me një të rënë të tastës je në Nagasaki, apo në ishujt Fixhi.

Do të më pëlqente të dija mendimin tuaj mbi ndikimin e rrjeteve sociale në rolin e zëdhënësit në Shqipëri ? Po zbehet ai ?

Po mendoj se interneti e ka bërë këtë. Më kujtohet në vitin 1997-98 unë isha reporter që mbuloja policinë dhe prokuorinë e Tiranës. Ishte lumturia ime më e madhe profesionale kur siguroja komunikatën e ditës të policisë dhe të merrja aty shënim lajmet për t'i botuar si scoop në gazeten Koha Jonë. Ndërsa sot gazetari i policisë i kërkon llogari zëdhënës së policisë përse ia kishte vonuar gjysmë ore emal-in me komunikatën e policisë. Ja ky është “case” që na bën të kuptojmë shumë.

Si e shikoni të ardhmen e mediave shqiptare duke parë shtrirjen që ka marre interneti ?

Atë kokëfortësi që është duke u kultivuar tani nuk do të thotë që do vazhdojë gjatë. Unë jam I bindur që në kioska mund të shiten çamçakëz dhe cigare, por jo më gazeta. Bota do jetë on line, on line, online.

Pesë gjërat që një gazetar sot, në këtë kontekst ndryshimesh, duhet t'i dijë ?

Shumë kërkoke Doriana...! Mund të jenë më pak por edhe më shumë. Më kryesorja fare, por fare fare është të jetë i ndershëm. Të vetmin përkufizim se si duhet të jetë një gazetar ne na vjen nga vitit 1930 nga korifeu I letrave shqipe Gjergj Fishta. Kur drejtoja gazetën “Panorama” unë e kasha të vendosur në kornizë këtë poezi të tij. Ja çfarë shkruan ai

Jo po, kshtu asht, mor t’u ngjatët jeta
Për me shkrue, zotni, m’gazeta
Duhet shkruesi t’jetë ma parë
Njeri i ndershëm e atdhetar
T’jetë fisnik, zemër-bujar,
Jo intigrant e ngatërrestar,
Edhe kenë mos t’ke afije
Mandej duhet qi t’ket dije
Dije t’hapët n’ekonomi
N’histori e në tregti
N’politikë e në drejtësi:
Edhe t’dijë shk’asht shkolla e msimi
Shka asht lirija e qytetnimi
T’jetë shqiptar në shkrim e n’gojë:
Fjalë n’pendë mos t’i ngurrojë.

Cilat kanë qenë veçoritë e mediave ku keni punuar ?

Po, një pyetje që sa herë më bëhet unë kam dëshirë të përgjigjem. Në gazetën Koha Jonë unë u rrita dhe u bëra gazetar që nga fillimi pa e ditur këtë profesion. 16 vjet më parë, unë atje mora njohuritë bazë të këtij profesioni dhe atje kalova të gjitha hallkat e karrierës nga reporter në drejtues. Pa dyshim kam punuar në vendin, kohën dhe me njerëzit e duhur. Sot, shumica e atyre që kanë punuar në gazetën Koha Jonë janë gazetarët më të rëndësishëm në Shqipëri. Më pas unë kam drejtuar gazetën Panorama, një gazetë që u bë më e madhja në Shqipëri. Ndjej kënaqësi që kjo gazetë vazhdon dhe sot të jetë gazeta më e madhe dhe më e mirë në Shqipëri. Më pas kam qenë bashkëthemelues drejtues i gazetës Tirana Observer dhe i emrit të saj. Kjo gazetë është dhe mbetet sfida më e madhe e karrierës sime. Unë e cilësoj sfidë sepse të krijosh një gazetë nga e para, ta fusësh në treg kur ti ndërkohë je drejtues i gazetës më të madhe në vend dhe e lë atë për të bërë një sfidë si ajo për Tirana Observer, mendoj se vlen diçka. Natyrisht unë këtë sfidë nuk e bëra vetëm. Kam rastin të falenderoj botuesin e saj Lefter Sota por edhe ata djem edhe vajza që drejtoja për afër pesë vjet. Më pas unë për më shumë se dy vjet isha drejtor i lajmeve në ORA NEWS TV, një stacion informtaiv që u bë televizioni informativ më i rëndësishëm në vend. Ndjeva kënaqësi të veçantë një ditë kur pronari i këtij televizioni Ylli Ndroqi përmendi që në zgjedhjet e vitit 2011 ky TV arriti 1.5 milionë klikime në ditë. Ishte pikërisht momenti kur unë drejtoja lajmet dhe informacionin e këtij televizioni dhe kjo është një çertifikatë që të vlen shumë në CV. Më pas për më shumë se një vit e gjysmë drejtova emisionin tim Arena dhe Intervista nga Roland Qafoku në Planet TV. Mendoj se aty unë formëzova emsionet e mia në ekran. Dhe tani jam në një sidë të re në televzionin Channel One. E vlerësoj pronarin Ylli Ndroqi dhe të këtij kanali televiziv për besimin dhe mbështetjen për të bërë të mundur që unë të tregoj vlerat e mia profesionale.


* Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi

Intervistoi Doriana Metollari

Dërgo me email | Stampo artikullin